كان أحسن عيل يلعب كوره شراب
يتشعبط ف الحناطير
و يرفرف بجناح الروح
فرخ يمام
طالع من قلب حجر صوان
بيلقط
مواويل و أغاني السريحه
علي باب الله
و دعاوى العواجيز بالستر
في المولد
كان بيشيل البيرق
و بيذكر و يا الدراويش
و ف يوم الجمعه
يسرق مداسات الجامع
جن مصور
أول ما اتعلم فك الخط
حدف الطباشيره ف وش الخوجه
وراح ع الكورنيش
يمسح عربيات
ويبيع ياسمين للعشاق
كان حلمه بعيون بنت بتاع الكشري
و بإنه يكون سواق تاكسي
يسكن ف الأوضة البحرى
فوق سطح عمارة عصفور
حدوتة حواديت حي بولاق
صابر ...صابر
حب الدنيا
خدها ف حضنه
و جرى
ويا الأيام رهوان مهووس بالشوق
لربيع الحلم
عدى العشرين أمشير
جي له إشاره
_إحضر فورا_
حط الياسمين و الفوطة
ف البدروم
وطلع ع الجبهه
لبس - الكاكي-
و ف ساعة الصفر
شد سلاحه
نط ف قلب المالح
و عبر أمواج الخوف اللي بتغلي
و طلع ع الشط التاني
هد جدار الموت
إنصابت رجله
سال الدم علي السلك الشايك
شربه
اخضر
و طرح ورد
و سنابل قمح
غطوه بالرايه
زفوه للجرح
في المستشفي الميرى
ركب حتة رجل بلاستيك
و خرج للسكه
فكرها و قال :
يلا نقابل بكره
عملت مش فاكره
أخرتها
اتحط
علي حتة كرسي
قدام باب الحمام العام
ف - ميدان التحرير-
ينزف عطشه
فيكرمش وش النيل
ويدبل صبار الجبانه
و مره
خد بعضه و راح السيما
ف نهاية العرض
نزل الجمهور تصفيق و هتاف
يحيا بطل الفيلم
سبك الدور و كإنه
بيحارب بصحيح و عبر
تصفيق و هتاف
و صاحبنا
عيط ...نهنه
كان اللي يشوفه يقول :
متأثر بالأحداث
أتاريه
كان بيمثل مشهد حي
حذفوه في المونتاج
وف يوم العيد
الواد ابنه
كان عاوز عجله و بدلة ظابط
جاب له
هلاهيل - البدله الكاكي - اللي ورثها من الحرب
قال له :
خد
إبقي البس دى و انت بتتعلم
عند الميكانيكي اللي ف آخر الشارع
بكره هتصبح أسسطي كبير
حضنه
بص علي النياشين و النجمه
اتنهد ....غني
-ع اليادى اليادى اليادى -
طلع من جيبه
نص سيجاره
مسكه ف إيده
واتبسم
غمض عينه
نام من يومها
للآن ....
مابيصحاش منه
غير صرخه
كل سنه
يوم عيد النصر
بتطرطش
تماثيل الميادين العامه
و حيطان النصب التذكارى
بالدم
من ديوان بعلم الوصول
مقالات أخرى للكاتب
قصيدة رأس السنة
مواويل وتناتيش للذكرى
